سلسلة من النقالات من اللاجئين المصريين في كوريا 2:
حلم الحقوق والحريات وظلم الواقع
〈노동자 연대〉 구독
الاستعباد الوظيفي المستمر هو أحد أصعب التحديات اللي بنواجهها كطالبي لجوء في كوريا.
الكل عارف إن الشغل صعب وله ظروفه، وده طبيعي.
لكن السؤال الحقيقي: هل المشكلة في صعوبة الشغل نفسه؟
الإجابة: لأ.
المشكلة الأكبر في المعاملة، والضغط، والاستغلال اللي بنتعرض له.
والأسوأ؟
في شركات بترفض تشغلنا من الأساس، لمجرد إن الإقامة بتتجدد كل 6 شهور، وده بيخلي صاحب الشغل يحس إنه مجبر يروح كل شوية للإيمجريشن علشان يجدد التصريح.
بعضهم كمان بيخاف نكسر الفيزا ونفضل في البلد، فبيرفضوا يشغلونا تمامًا.
وبالتالي، بقينا قدام خيارين:
يا إما يتم رفضنا، أو يتم استغلالنا.
موضوع تاني مهم: التأمين الصحي.
لو مش بنشتغل، مش مسموح لنا نعمل تأمين صحي.
يعني وأنا عاطل ومش لاقي شغل، بدل ما الدولة توفرلي دعم أو حتى تأمين مدفوع، بيتمنع عني حتى التأمين اللي بفلوس!
هل طبيعي أكون مريض ومش قادر أزور طبيب؟!
المعاناة اللي بمر بيها كلاجئ أكبر بكتير من إنها تُختصر في سطور.
أنا خرجت من بلدي بسبب ظلم، وجيت هنا أواجه ظلم من نوع تاني:
في التوظيف، والتأمين، وحتى الدراسة.
معاناة مستمرة، بأشكال مختلفة، ومخفية عن عيون الناس،
لأننا في نظرهم مجرد “أرقام”.
لكن الحقيقة؟
أنا مش رقم.
أنا إنسان.
عندي طموح وآمال.
وعندي دلوقتي زوجة وطفل.
وأتطلع لليوم اللي تنتهي فيه المعاناة دي، ويبدأ فيه مستقبل فيه كرامة وعدالة.
شكرا لكم
